mmnewyork.org

ကုလသမဂ္ဂ လူ့အခွင့်အရေးကောင်စီ၏ (၅၃) ကြိမ် မြောက် အစည်းအဝေးကာလအတွင်း ၆-၇-၂ဝ၂၃ ရက်တွင် မြန်မာနိုင်ငံ၏ လူ့အခွင့်အရေးအခြေအနေဆိုင်ရာ အထူးအစီရင်ခံစာ တင်သွင်းသူ၏ နှုတ်ဖြင့်အစီရင်ခံမှုအပေါ်အပြန်အလှန် ဆွေးနွေးမှုပြုလုပ်ခဲ့ကြောင်း သိရှိရသည်။

 

-​မြန်မာနိုင်ငံအနေဖြင့် အထူးအစီရင်ခံစာတင်သွင်းသူ၏ နှုတ်ဖြင့်အစီရင်ခံမှုနှင့် ကောင်စီသို့ အစည်းအဝေးစာရွက်စာတမ်းအဖြစ် တင်သွင်းခဲ့သော “အမေရိကန်ဒေါ်လာ (၁) ဘီလီယံ တန်ဖိုးရှိ သေစေနိုင်သောကုန်သွယ်မှု – မြန်မာနိုင်ငံအတွင်း လူ့အခွင့်အရေးချိုးဖောက်မှုများကို ဖြစ်စေသည့် နိုင်ငံတကာလက်နက်ကုန်သွယ်မှုလမ်းကြောင်းများ” ခေါင်းစဉ်ဖြင့် အစည်းအဝေး စာရွက်စာတမ်း (A/HRC/53/CRP.2) ထုတ်ပြန်ခဲ့မှုစသည့် လက်ခံနိုင်ဖွယ်မရှိသောအပြုအမူ ကို မီးမောင်းထိုးပြလိုသည်။ အစိုးရကိုသိက္ခာချရန် ကြိုးပမ်းမှုအဖြစ် အကန့်အသတ်မရှိ အစည်းအဝေးစာရွက်စာတမ်းများ ထုတ်ပြန်နိုင်ရန်အတွက် ဉရောပသမဂ္ဂနှင့် အနောက်နိုင်ငံ များက အထူးအစီရင်ခံစာတင်သွင်းသူကို ဆီလျော်မှုမရှိသောလုပ်ပိုင်ခွင့် ပေးအပ်ထားသည်။

 

-​အစည်းအဝေးစာရွက်စာတမ်းသည် မြန်မာနိုင်ငံအပေါ် အနောက်နိုင်ငံအချို့က ချမှတ်ထား သည့် တစ်ဖက်သတ်ဒဏ်ခတ်ပိတ်ဆို့မှုများကို အလေးပေးဖော်ပြထားပြီး နိုင်ငံတကာ ရာဇဝတ်မှုများကျူးလွန်ကြောင်း စွပ်စွဲချက်များဖြင့် ပိုမိုပြင်းထန်သော အရေးယူပိတ်ဆို့မှုများ ပြုလုပ်ရန် တောင်းဆိုထားသည်။ အကြမ်းဖက်မှုများ၊ နိုင်ငံတကာဥပဒေကို ကျယ်ပြန့်စွာ ချိုးဖောက်မှုများနှင့် နိုင်ငံတကာလူ့အခွင့်အရေးနှင့် လူသားချင်းစာနာ ထောက်ထားမှုဉပဒေ များတွင် တားမြစ်ထားသည့် ဆိုးဝါးသောရာဇဝတ်မှုများကို ကမ္ဘာတစ်ဝန်းတွင် ကျူးလွန်နေပြီး လူ့အခွင့်အရေးကာကွယ်သူများအဖြစ် အသွင်ယူနေသည့်နိုင်ငံများသို့ အထူးအစီရင်ခံစာတင်သွင်းသူက အကြံပြုနေခြင်းဖြစ်သည်ကို မှတ်သားသင့်သည်။

 

– နိုင်ငံတော်က မြန်မာပြည်သူများ၏ ကျန်းမာရေး၊ ပညာရေးနှင့် လူမှုဖူလုံရေးအပါအဝင် အများပြည်သူဆိုင်ရာ ဝန်ဆောင်မှုများအတွက် သုံးစွဲလျက်ရှိသည့် အစိုးရပိုင်စီးပွားရေး လုပ်ငန်းများ၏ဝင်ငွေအပေါ် အထူးအစီရင်ခံစာတင်သွင်းသူက သေးသိမ်ကျဉ်းမြောင်းစွာ အဓိပ္ပါယ်ဖွင့်ဆိုမှုကို အံ့အားသင့်ရသည်။ ထိုကဲ့သို့သော လုပ်ငန်းများအပေါ် ဒဏ်ခတ် ပိတ်ဆို့မှုများ ချမှတ်ရန် ၎င်း၏တောင်းဆိုချက်သည် ပြည်သူများကို ထိခိုက်စေရန်နှင့် မြန်မာနိုင်ငံ၏ ဖွံ့ဖြိုးတိုးတက်မှုအခွင့်အရေးကို ချိုးဖောက်ရန်အတွက်သာဖြစ်သည်။

 

-​အထူးအစီရင်ခံစာတင်သွင်းသူသည် ကလေးငယ် ၂ဝ၂ ဦး၊ ဆရာ/ဆရာမ ၈ဝ ဉီး၊ သံဃာ ၇၄ ပါး၊ ကျေးရွာနှင့် ရပ်ကွက်အုပ်ချုပ်ရေးမှူး ၈၂၅ ဦးနှင့် အခြားသော ပြည်သူ့ဝန်ထမ်း ၂၅၁ ဦး၊ ဆေးဘက်ဆိုင်ရာဝန်ထမ်း ၁၇ ဦး၊ ၎င်းတို့နှင့် နိုင်ငံရေးပါတီများမှ ပါတီဝင်များ အပါအဝင် အပြစ်မဲ့အရပ်သား ၆,ဝ၉၁ ဦး သေဆုံးစေခဲ့သော CRPH၊ NUG နှင့် PDF အကြမ်းဖက် အဖွဲ့အစည်းများ၏လုပ်ရပ်များကို အမွှမ်းတင်ရေးသားထားသည်။

 

– အထူးအစီရင်ခံစာ တင်သွင်းသူသည် ဒေသတွင်းနိုင်ငံများသို့ လှည့်လည်သွားရောက်ပြီး NUG နှင့် PDF အကြမ်းဖက်အဖွဲ့အစည်းများအတွက် စည်းရုံးမှုများပြုလုပ်ပေးခြင်းနှင့်တစ်ပြိုင်နက် ဒေသတွင်းနှင့် အခြားသောအဖွဲ့အစည်းများ၏မူဘောင်အတွင်း နှစ်နိုင်ငံနှင့် နိုင်ငံစုံ ဆက်ဆံရေးကဏ္ဍတွင် မြန်မာနိုင်ငံအား မည်သို့သီးခြားခွဲခြားရမည်ကို အချုပ်အခြာ အာဏာ ပိုင်နိုင်ငံများအား အမိန့်ပေးလျက်ရှိသည်။ အထူးအစီရင်ခံစာတင်သွင်းသူ၏ ယင်းကဲ့သို့ ဆိုးရွားသော အပြုအမူများသည် လူ့အခွင့်အရေးကောင်စီ၏ ဂုဏ်သိက္ခာကိုကျဆင်းစေသည်။ အထူးအစီရင်ခံစာတင်သွင်းသူများ လိုက်နာရမည့် ကျင့်ဝတ်၏ အပိုဒ် ၃ (စ) ပါ မည်သည့် အစိုးရ၊ လူပုဂ္ဂိုလ်တစ်ဦးချင်း၊ အစိုးရ သို့မဟုတ် အစိုးရမဟုတ်သောအဖွဲ့အစည်းများနှင့် ဖိအားပေးသောအဖွဲ့အစည်းများ၏ ညွှန်ကြားချက်များကို မည်သို့ပင်ဖြစ်စေ ရယူ၊ လက်ခံ ဆောင်ရွက်ခြင်းမပြုရန် ဖော်ပြချက်ကို အထူးကိုယ်စားလှယ်အနေဖြင့် လိုက်နာရန် လိုအပ်ကြောင်းသတိပေးအပ်သည်။

 

– ရခိုင်ပြည်နယ်မှရွှေ့ပြောင်းနေထိုင်သူများအား ပြန်လည်လက်ခံရေးကိစ္စတွင် မြန်မာနှင့် ဘင်္ဂလားဒေ့ရှ်အစိုးရများသည် ရှေ့ပြေးစီမံကိန်းကို အကောင်အထည်ဖော်ရန် ဆက်လက် ပူးပေါင်းဆောင်ရွက်လျက်ရှိသည်။ ရွှေ့ပြောင်းနေထိုင်သူများအား ပြန်လည်လက်ခံရေး အတွက် နိုင်ငံများ၏ကြိုးပမ်းဆောင်ရွက်မှုများကို အားလျော့စေမည့် အထူးအစီရင်ခံစာ တင်သွင်းသူ၏ ၈-၆-၂ဝ၂၃ ရက်တွင် သတင်းထုတ်ပြန်ချက်အပေါ် မြန်မာနိုင်ငံကရှုတ်ချသည်။

 

– မြန်မာနိုင်ငံ လူ့အခွင့်အရေးအခြေအနေဆိုင်ရာ အထူးအစီရင်ခံစာတင်သွင်းသူ၏ လုပ်ပိုင် ခွင့်နှင့် ၎င်း၏မည်သည့်လုပ်ဆောင်ချက်ကိုမဆို အသိအမှတ်မပြုကြောင်းနှင့် လက်ခံခြင်းမရှိ ကြောင်း သက်ဆိုင်ရာနိုင်ငံဖြစ်သည့် မြန်မာနိုင်ငံ၏ရပ်တည်ချက်ကို အကြိမ်ကြိမ် အခိုင်အမာ ဖော်ပြခဲ့ပြီးဖြစ်သည်။

 

– ကုလသမဂ္ဂလူ့အခွင့်အရေးကောင်စီက ဖန်တီးထားသည့် ပုံစံတူလုပ်ပိုင်ခွင့်များသည် အချိန် နှင့် အရင်းအမြစ်များကို ဖြုန်းတီးနေခြင်းသာဖြစ်ပြီး အကျိုးမရှိကြောင်း မြန်မာနိုင်ငံအနေ ဖြင့် ရှုမြင်သည်။ ထို့ကြောင့် မြန်မာနိုင်ငံသည် ကုလသမဂ္ဂလူ့အခွင့်အရေးကောင်စီတွင် နိုင်ငံတစ်နိုင်ငံအပေါ် ဦးတည်လျက် တစ်ဖက်သတ် အပြန်အလှန်ဆွေးနွေးခြင်းနှင့် အထူး အစီရင်ခံစာတင်သွင်းသူ၏ နိုင်ငံရေးသွတ်သွင်းကာ မျှတမှုမရှိသော လိမ်လည် ပြောဆို တင်ပြချက်များအပေါ် ပြင်းထန်စွာကန့်ကွက်ကြောင်း ထပ်လောင်းဖော်ပြအပ်သည်။

 

ကုလသမဂ္ဂနှင့် အခြား နိုင်ငံတကာ အဖွဲ့အစည်းများဆိုင်ရာ မြန်မာအမြဲတမ်းကိုယ်စားလှယ်အဖွဲ့ရုံး

ဂျီနီဗာမြို့။